Brussel

Ef þú stendur á miðju torgi umkringdu sögufrægum og fallegum byggingum, fullu af áhugasömum túristum og mikilvægum stjórnmálaspekúlöntum, öllum í leit að næsta gómsæta bita, ertu að öllum líkindum í Brussel. Þessi hálfgerða höfuðborg Evrópusambandsins er líka einn besti áfangastaður í heimi fyrir matgæðinga.

Áður en þú hleður á þig aukakílóunum sem er óhjákvæmilegt í Brussel, borgar sig að minnast strax á að það er meira í boði í borginni en matur. Það er líka lítil stytta af dreng að pissa í gosbrunn. Þetta hljómar eins og brandari en Manneken Pis er eitt frægasta kennileiti borgarinnar og er í alvöru bara pínulítill gosbrunnur. Hann er hins vegar stór hluti af karakter borgarinnar og kímnigáfu og honum fylgir alls konar skemmtilegheit eins og skrítnar þjóðsögur og fyndnir búningar en styttan er klædd í nýjan búning margoft í viku. Fæstir yfirgefa Brussel án þess að hafa nælt sér í a.m.k. eina Manneken Pis-eftirlíkingu í lundabúð og elska hana til æviloka. Yfir í matinn…

Í Brussel er að finna fjöldan allan af Michelin-stjörnu veitingastöðum og dásamlega hitaeiningaríkum þjóðarréttum sem aðeins Flæmingjar geta töfrað fram. En það eru líklega eftirréttirnir og sælgætið sem Brussel er frægust fyrir. Belgískt súkkulaði og belgískar vöfflur eru einkennisgóðgæti Brussel en þegar gestir og gangandi hafa úðað í sig dýrindis súkkulaði er nauðsynlegt að smakka líka heimsfræga konfektið og gómsætu hnetustykkin. Þeir sem geta ekki hugsað sér að borða meira ættu að snúa sér að bjórnum. Þetta er jú óformleg bjórhöfuðborg Evrópu. Bjórhátíðir, bjórferðir, litríkar krár og handverksbjórgarðar mynda hér einhverja fáguðustu bjórmenningu heims.

Og ef fríið er orðið aðeins of syndsamlegt í allri neyslunni er komið að skoðunarferðunum því hér er nóg að sjá og gera fyrir utan áðurnefndan gosbrunn. Gullfallegt Grand Place torgið ætti að vera efst á lista og því næst hin einstaka Atomium-bygging og sýningarnar innandyra. Tinna-aðdáendur (sem eru líklega allir í heiminum), ættu að fara beint á Hergé-safnið rétt fyrir utan borgina og þeir sem hafa tíma í dagsferð ættu ekki að missa af nágrannaborginni Bruges, einhverri ævintýralegustu fegurðardrottningu Evrópu.

Brussel er borg sem ætti að njóta í algjörri núvitund og andlegur leiðsögumaður og fyrirmynd ferðarinnar ætti að vera rólyndið uppmálað, hefðarmaðurinn og nautnaseggurinn Hercule Poirot. Njóttu vel og hafðu það sem allra best í Brussel.