Flug til Berlínar á lægsta verði með PLAY frá 9.904 kr. *

Ódýrt flug til Berlín

Sögufrægir staðir og stórbrotin fjölþjóðamenning

Verið velkomin til Berlínar, borgar sem er svo stappfull af sögu og menningu að hún er eins og risastór skemmtigarður fyrir lengra komna. Þessi evrópska stórborg býr yfir mörgum ólíkum sérkennum en fyrir þá sem eru að sækja hana heim í fyrsta sinn er vert að fara yfir tvær helstu hliðar Berlínarborgar.

Sú fyrri er merkileg og dramatísk saga borgarinnar út frá sögulegu sjónarmiði sem er bæði lifandi og nálæg hvert sem litið er. Stríðshrjáð saga Berlínar er varðveitt af metnaði í fjölmörgum söfnum og minnisvörðum borgarinnar á djúpstæðan og virðingarverðan hátt. Þessi þörf fyrir að muna, íhuga og varðveita er best lýst með þýska orðinu yfir minnisvarða, „Denkmal,“ sem þýðir bókstaflega „stund íhugunar“ en það er líklega það sem Þjóðverjar gera betur en flestar aðrar þjóðir. Fyrir vikið er Berlín í sérstöku uppáhaldi hjá sögunördum og áhugafólki um allt sem mannlegt er.

Hin hliðin er mun léttari og litríkari. Þessi margslungna stórborg er bæði vestræn og alþjóðleg. Hér býr mikill fjöldi innflytjenda sem lífgar upp á borgina á skemmtilegan og fjölbreyttan hátt. Að ganga í gegnum ólík hverfi Berlínar er hálfgert ferðalag um heiminn og það er í raun fátt sem ekki má finna einhvers staðar í Berlín. Matarmarkaðir, veitingastaðir og götusalar gerast ekki fjölbreyttari og menningarbrotin bjóða hvarvetna upp á vörur og upplifanir frá sínum heimalöndum. Þetta er rétta borgin til að ráfa um, borða eitthvað skrítið og gómsætt, versla eitthvað litríkt og upplifa eitthvað glænýtt.

Geggjaður göngutúr í Berlín

Þá eru ótaldir fjölmargir heimsfrægir áfangastaðir innan borgarinnar. Listi yfir það sem vert er að sjá og gera í Berlín gæti fyllt heilt bókasafn en sem dæmi um hversu þétt raðað er í Berlín af merkilegum stöðum er hér eitt stykki ímyndaður hálftíma göngutúr.

Gakktu í gegnum gullfallegan almenningsgarðinn Tiergarten, fram hjá Reichstag byggingunni, í gegnum sögufrægt Brandenborgarhliðið og niður breiðstrætið Unter den Linden þar til þú kemur að risastórri Museumsinsel. Hvað er það eiginlega? Æ, bara eyja í ánni Spree í miðri borginni þar sem finna má fimm risavaxin söfn, full af stórmerkilegum safnmunum.

Þetta er einmitt ástæðan fyrir því að það borgar sig að gefa sér góðan tíma í Berlín, en engar áhyggjur, það er nánast öruggt að þessi stórfenglega stórborg mun kalla á þig aftur og aftur og aftur.