Flug til Dublin á lægsta verði með PLAY frá 9.006 kr. *

Ódýrt flug til Dublin

Bókmenntaborgin Dublin

Höfuðborg og stærsta borg Írlands er sjarmerandi og vinalegur staður fullur af áhugaverðri sögu og líflegri menningu. En Dyflinn, eins og vel máli farnir Íslendingar kalla hana, er líka talin ein fallegasta borg heims, ekki síst vegna gullfallegra göngugatna við árbakkana, steini lögðu strætanna og sögufrægra bygginganna. Dublin á sér líka djúpar rætur bókmennta og menningar og héðan hafa komið Nóbelsverðlaunahafar á borð við Yeats, Beckett og George Bernhard Shaw. Þeir sem hyggja á heimsókn til Dublin er ráðlagt að lesa eitthvað af mörgum verkum James Joyce sem gerast í borginni eða taka skorpu í Oscar Wilde.

Bókanördar, arkitektúrsáhugamenn, sagnfræðilúðar og jafnvel svölustu áhrifavaldar ættu allir að finna eitthvað til að taka aðdáunarverð andköf yfir í Dublin en þau andköf verða líklega öll í kór þegar gengið stígur fyrst fæti inn í gamla bókasafnið í Trinity College. Hér mætast efni (gríðarlegt safn sjaldgæfra og verðmætra bóka) og útlit (gullfallegur og áhrifaríkur salurinn) í einni stórkostlegri upplifun og allir upplifa sig aðeins klárari og veraldarvanari áður en yfir lýkur.

Nýja besta vinkona þín

En þeir sem halda að Dublin sé fyrst og fremst frábær sögunnar og fortíðarinnar vegna eru fljótir að skipta um skoðun eftir stutta stund í borginni. Bjóráhugamenn geta varið áhugaverðum degi undir áhrifum í Guinness-verksmiðjunni á meðan viskívitarnir geta farið beint í Jameson-brugghúsið. Þá eru ótaldar fjölmargar sjarmerandi krár Dyflinnar og litríkt næturlífið í þessari hressu og skemmtilegu borg. Bindindismenn og yngri kynslóðin hefur að sjálfsögðu líka nóg fyrir stafni og tilvalin afþreying að skoða dýragarð eða grasagarð borgarinnar sem báðir eru ógleymanlegir áfangastaðir í ævintýrilegu umhverfi.

Dublin eignast vini fyrir lífstíð og því er óþarfi að hlaupa á milli Dyflinnarkastala, Kilmainham Gaol fangelsisins eða St Patrick‘s dómkirkjunnar á einni helgi. Það eru allar líkur á því að þú munir koma aftur að hitta Dyflinn, nýju bestu vinkonu þína.