Flug til Álaborgar á lægsta verði með PLAY frá 19.498 kr. *

Ódýrt flug til Álaborg

Sjarmör af gamla skólanum

Álaborg er sjarmerandi borg í norðurhluta Jótlands í Danmörku. Þessi fjórða stærsta borg landsins á rætur sínar að rekja til 8. aldar og Álaborg samtímans er vinsæll ferðamannastaður vegna ríkrar sögu sinnar, fallegra garða og spennandi menningarlífs.

Eitt helsta aðdráttaraflið í Álaborg er Álaborgarturninn sem stendur í miðju borgarinnar. En það er frekar útsýnið úr turninum en útlit hans sem heillar því úr toppi hans má sjá gríðarlegar vegalengdir yfir borgina og út á landsbyggðina í kring. Í Álaborg er einnig að finna fjöldann allan af söfnum og galleríum, þ.m.t. Söguminjasafn Álaborgar sem gerir sögu borgarinnar og svæðisins í kring góð skil.

Þeir sem kunna að meta góða útivist ættu að kynna sér fallega garða og græn svæði Álaborgar. Í dýragarði borgarinnar er síðan að finna rúmlega 1500 dýr frá öllum heimshornum, þ.m.t. ísbirni, rauða pandabirni og ljón og í garðinum er einnig gott úrval af leiksvæðum og grænum svæðum. Utzon Center, sem heitir í höfuðið á arkitektinum sem hannaði hana, er falleg bygging í módernískum stíl en þar er reglulega að finna sýningar og viðburði sem tengjast listum, hönnun og arkitektúr.

Ævintýraleg matarmenning

Eins og margar danskar borgir er Álaborg frábær áfangastaður fyrir matargöt og lífskúnstnera en þar er sannarlega urmull af fjölbreyttum veitingastöðum og kaffihúsum sem bjóða bæði danska og alþjóðlega rétti. Næturlífið er líka í miklum blóma og úrval skemmtistaða, bara og viðburða er frábært. Skemmtunin nær þó líklega hámarki í maí á hverju ári þegar árlegt Álaborgar-Karnival er haldið með pompi og prakt.

Álaborg er lifandi og litrík menningarborg með fjölda áhugaverðra áfangastaða en líklega er helsta aðdráttaraflið þessi persónulega reynsla af því að njóta ævintýralegs og afslappaðs andrúmsloftsins. Og kannski er það einmitt það besta við Danmörku, þessi einstaka blanda af framúrstefnu og nútímahönnun, jafnrétti, sögu og vinalegu viðmóti sem heillar alla sem sækja hana heim. Láttu ævintýralega draumana rætast í vinalegu umhverfi í Álaborg í sumar.