Flug til Aþenu á lægsta verði með PLAY frá 23.900 kr. *

Ódýrt flug til Aþenu

Fornmenning og fegurð

Það er erfitt að lýsa höfuðborg Grikklands án þess að nota stór orð og enn stærri fullyrðingar. Í Aþenu urðu til margar hugmyndir og kenningar sem samfélög nútímans byggja á og borgin er oft kölluð vagga vestrænnar siðmenningar. Hér bjuggu líka kappar eins og Sókrates, Plató og Aristóteles, heimspekingar sem mótuðu hugsun Vesturlandabúa í mörg þúsund ár og gera enn. Að ganga um götur Aþenu, einnar elstu borgar heims, er fyrir vikið magnaður göngutúr um þennan hluta mannkynssögunnar síðastliðin 3.400 ár. Þeir sem eru að heimsækja borgina í fyrsta sinn ættu því að halda beint upp á Akrópólis-hæð og skoða Parthenon ásamt öðrum hofum frá Grikklandi til forna. Rústir, hof, styttur, gosbrunnar og glæsilegar byggingar frá ýmsum tímabilum er að finna hvarvetna um borgina en ef þessar fjölmörgu sögulegu minjar reynast yfirþyrmandi mælum við sérstaklega með fornleifasafni Grikklands (National Archaeological Museum) sem veitir gestum þægilega og góða innsýn inn í hlutverk Aþenu í gegnum árþúsundin. En hér snýst ekki allt um marmara, gríska guði og fornminjar. Aþena okkar tíma er skemmtileg og lifandi borg með þægilegum gönguleiðum og hér er frábært að leyfa sér að týnast í litríkum strætunum og hressandi götumenningu. Óskipulagður göngutúr er líka besta leiðin til að kynnast stórfenglegri matarmenningu borgarinnar þar sem mætast ferskt og heilsusamlegt hráefni Miðjarðarhafsins annars vegar og stórborgarnýbreytnin hins vegar. Ekki missa af klassíkinni koulouri, sérstakri beyglu Aþenubúa þess á milli sem bragðað er á stórfenglegum réttum á fjölmörgum Michelin-veitingastöðum borgarinnar. Þegar þú hefur fengið nóg af geggjuðum götumat og litríku mannlífinu er tilvalið að halda upp á Lycabettus-hæð, hæsta punkti borgarinnar og skoða fallegan útileikvanginn og magnað útsýnið.

Grísk paradís og gylltar strendur

Staðalímyndin af sumarfríi í Grikklandi er af hvítþvegnum húsum, kristaltærum sjó, paradísarströndum og æðislegum sjávarréttum með afslöppuðum heimamönnum í fullkomnu veðri. Þessi hugmynd er raunveruleikinn á fjölmörgum Miðjarðarhafseyjum undan ströndum Grikklands en margar þeirrar eru í þægilegri fjarlægð frá Aþenu. Ef ferðinni er ekki heitið á einhverja paradísareyjuna mælum við með dagsferð í siglingu til að fá að minnsta kosti hugmynd um þessi lífsgæði og þennan góðan fíling. Hver veit nema þín eigin músa verði á vegi þínum og þú munir skrifa eitt frægasta lag aldarinnar í kjölfarið. Það var a.m.k. raunin hjá Leonard Cohen og Suzanne á eyjunni Hýdru. Ef sjóferð og eyjaráp er ekki í kortunum gæti Ólympíuleikvangurinn Panathenaic frá 4. öld f. Kr. heillað. Þessi einstaki leikvangur er alfarið gerður úr hvítum marmara og hér voru fyrstu Ólympíuleikar nútímans haldnir árið 1896.

Hvað svo sem verður á vegi þínum í Aþenu eru allar líkur á því að borgin muni sigra hjarta þitt því Aþena er að sjálfsögðu alltaf að keppa um gullið.