Íslendingum fjölgar og einingatekjur aukast

Flugfélagið PLAY flutti 87.415 farþega í janúar, samanborið við 99.704 farþega í janúar í fyrra. Þetta endurspeglar 11% mun á framboði á milli ára sem er bein afleiðing af ákvörðun PLAY að leigja eina af farþegaþotum sínum til GlobalX í Miami og aðlaga framboðið eftir árstíðarbundnum sveiflum. 

Sætanýting PLAY í janúar var 72,9%, samanborið við 74,8% í janúar í fyrra. PLAY hefur lagt aukna áherslu á aukið framboð til sólarlandaáfangastaða í Suður-Evrópu. Hlutur sólarlandaáfangastaða í leiðakerfi PLAY jókst um 5 prósentustig, úr 21% í 26%, á milli ára í janúar. Sólarlandaáfangastaðirnir gefa af sér betri afkomu, en þar sem um er að ræða beint flug frá Íslandi þar sem tengifarþegar eru ekki fyrir hendi, kemur það jafnan niður á sætanýtingu.

Þessi breyting hefur haft jákvæð áhrif á einingatekjur félagsins sem hafa aukist á milli ára. Með því að stýra framboði eftir árstíðarbundnum sveiflum og auka framboð á flugleiðum sem gefa af sér betri afkomu, hefur tekist að bæta fjárhagslega niðurstöðu. 

Janúar var fimmti mánuðurinn í röð þar sem vöxtur hefur orðið á einingatekjum á milli ára og líkt og áður hefur komið fram eru horfur á að sú þróun haldi áfram árið 2025. 

Af þeim farþegum sem flugu með PLAY í janúar voru 32,2% á leið frá Íslandi, 37,6% voru á leið til Íslands og 30,1% voru tengifarþegar (VIA). Þrátt fyrir minna framboð varð aukning á milli ára á farþegum sem voru á leið frá Íslandi, úr 27 þúsund í janúar í fyrra í 28 þúsund í janúar í ár. Sömu sögu er að segja af ferðamönnum sem flugu með PLAY til að heimsækja Ísland, en tala þeirra fór úr 31 þúsund í janúar í fyrra í 33 þúsund í janúar í ár. 

Stundvísi PLAY í janúar var 79,2%, samanborið við 78,1% í janúar í fyrra, en janúarmánuður er jafnan krefjandi í flugrekstri á Íslandi vegna veðurs.

PLAY hefur sett áætlun í sölu fram til ársins 2026 til vinsælla áfangastaða í Bandaríkjunum og Evrópu. Í Bandaríkjunum mun PLAY halda úti áætlunarflugi til Boston, Baltimore og Washington DC um BWI-flugvöll ásamt New York, og munu þessar borgir áfram tengjast við lykilborgir í Evrópu. 

Á meðal vinsælla sólarlandaáfangastaða í Evrópu eru Tenerife, Las Palmas, Alicante, Lissabon, Malaga, Madeira og nýjasti áfangastaðurinn í leiðakerfi PLAY, Antalya í Tyrklandi. Þeir sem hafa hug á borgarferðum geta fundið flug til Kaupmannahafnar, Barcelona, Madríd, Lundúna, Liverpool, Amsterdam, Parísar og Dublin. 

Einar Örn Ólafsson, forstjóri PLAY: 

„Það er ánægjulegt að sjá Íslendingum fjölga sem fljúga með PLAY og það gefur sannarlega til kynna að við séum fyrsta val þeirra þegar bóka á ferð til sólarlanda. Þá er einnig gott að sjá þeim fjölga sem velja PLAY til að heimsækja Ísland, sem er jákvætt merki þess að PLAY sé að ná til fólks á erlendum mörkuðum. 

Ég er afskaplega stoltur af samstarfsfólki mínu hjá PLAY að ná að bæta stundvísina á milli ára í janúar. Þessir vetrarmánuðir geta verið ansi krefjandi í flugrekstri hér á landi, en hjá PLAY starfar fólk sem er staðráðið í að halda góðri stundvísi og forgangsraðar ávallt öryggi sem skilar sér í ánægju farþega og lægri kostnaði. 

Við höldum áfram á þeirri vegferð að bjóða frábæra þjónustu á góðu verði, sem gerir PLAY að frábærum valkosti fyrir þá sem vilja komast til sólarlanda, heimsækja Ísland eða fljúga á milli Bandaríkjanna og Evrópu.“