Skoða efni




London

London

Ódýr flug til London

London, höfuðborg Englands, er ekki bara evrópsk menningar- og fjármálaborg. Þetta er hin upprunalega stórborg, þungamiðja mannlífs og menningar. Þessi gamla borg hefur þjónað mörgum hlutverkum á ólíkum tímum sem einkennir borgina í gömlum minjum og skipulagi. Þessi ummerki er dásamlegt að uppgötva þegar maður ráfar um London. En ef þú týnist í þessum risastóra suðupotti borgarlífsins er gott að hafa eftirfarandi grundvallaratriði í huga.

London teygir anga sína út frá ánni Thames, sem er eitt helsta einkenni borgarinnar. Brýrnar yfir Thames eru helstu kennileitin hér og hver þeirra hefur sinn eigin sjarma. Í London má líka finna metnaðarfull græn svæði og fallega almenningsgarða sem tengjast margir hverjir sögu Bretlands sem heimsveldi. Gott dæmi um það er japanski Kyoto-garðurinn í Holland Park og gullfallegur St James Park fyrir framan Buckingham-höll. Eftir að hafa virt húsnæði drottningar fyrir sér er viðeigandi að kíkja á Westminster-höll, aðsetur breska þingsins og klukkuna heimsfrægu Big Ben í turni hennar, áður en haldið er yfir í kastalann Tower of London til að skoða krúnudjásnin í allri sinni dýrð.

Hvað er nauðsynlegt að skoða í London? Svo ótalmargt en efst á blaði væri líklega alltaf að njóta útsýnisins úr parísarhjólinu London Eye, að versla djásn í yfirbyggða markaðnum Covent Garden, að villast um krúttlegar verslanir í völundarhúsinu sem Seven Dials hverfið er, að láta þyrma yfir sig af mannfjöldanum sem ávallt einkennir Oxford-stræti, að skoða himinháa verðmiðana á Regent-stræti, að sjá söngleik í Soho og að stranda í umferð gangandi vegfaranda við Trafalgar-torg.

Þetta eru allt ómissandi áfangastaðir miðborgarinnar en eftir því sem hringurinn stækkar í borginni fjölgar bara sérstökum hverfum, áfangastöðum og upplifunum. Þeir sem hætta sér út fyrir innsta hring ættu ekki að láta fram hjá sér fara dásamleg hverfi eins og Shoreditch og Islington, gönguferðir meðfram fjölmörgum fallegum síkjum borgarinnar og útsýnisferð um glæsileg stórhýsin í Belgravia þar sem stjörnurnar búa. Hverfin Notting Hill og Marylebone eru síðan ómissandi fyrir þá sem vilja rölta um sjarmerandi búðir í verslunarleiðangri til að kaupa hönnun, skart og falleg föt.

Ekki láta ímyndunaraflið setja þér neinar hömlur því það er fátt sem ekki má finna, sjá, upplifa og kaupa í London. Lífið er ljúft í Lundúnum!